Zlatan Ibrahimovic kann nú erpa sær av at eiga eitt professiónelt fótbóltsfelag.
Fyri svenska blaðnum Aftonbladet váttar svenska fótbóltsjørnan, at hevur keypt ein fjórðing av Stokkhólm-felagnum Hammarby, sum spælir í bestu svensku deildini, Allsvenskan.
Hammarby hevur eisini váttað tíðindini á heimasíðu síni.
– Tað kennist heilt fantastiskt. Tað kennist spennandi við Hammarby, ein heilt onnur verkætlan, og eg eri óggvuliga eldhugaður.
– Eg fari at vera ógvuliga virkin, tann dag eg gevist við at spæla fótbólt. Eg gleði meg til at arbeiða við fótbólti frá hini síðuni, sigur Ibrahimovic við Aftonbladet.
Handilin kemur í lag við, at Zlatan Ibrahimovic hevur keypt helmingin av partabrøvunum í svenska partinum av amerikanska felagnum Anschutz Entertainment Group (AEG), sum eigur næstan helmingin av Hammarby.
ARG eigur harumframt Los Angeles Galaxy, sum Ibrahimovic spældi við frá mars 2018 til síðst í oktober í ár.
Málið hjá svianum er at gera Hammarby, sum endaði á triðjaplássi í júst endaðu Allsvenskan, til besta felag í Skandinavia.
– Tað eru eingi mørk fyri, hvussu stórt felag Hammarby kann gerast, sigur Ibrahimovic.
Tað er enn ikki kunngjørt, hvussu hann heldur fram á yrkisleið síni, men tað verður ikki í svenskum fótbólti.
– Eg havi sagt í tíggju ár, at eg ikki skal spæla fótbólt í Allsvenskan. Og tað verður so, sigur Ibrahimovic.
Í gjár undraði tað fótbóltsheimin, tá hann legði út eina video á Instagram, har ein Hammarby-troyggja veiftraði á eini svartari bakgrund.
Aftanfyri á troyggjuni stóð »Ibrahimovic«, men tað var ikki nágreinað, um áleyparin var nýggjur leikari í felagnum, ella hvat hetta snúði seg um.
/ritzau
