Í gjár hendi eitt ferðsluóhapp oman fyri bygdina í Hovi.
- Óhappið hendi, tá ein persónur á motorsúklu koyrdi eftir vegastrekkinum, og ein seyður leyp út á vegin og fyri motorsúkluna.
Vaktleiðarin visti í morgun at siga, at tá førarin royndi at skáka sær uttan um seyðin, datt hann á súkluni.
- Vit vita ikki ítøkiliga, hvussu førarin kom burtur úr hesum, men vit fingu at vita, at hann gekk yvir í sjúkrabilin.
Løgreglan sigur, at førarin á motorsúkluni bæði var í hjálmi og hevði ryggverju, tá óhappið hendi.
