Tað var annars samgongan frá 1985-89, sum hevði sett sær fyri at fáa samtykt lógina um javnstøðu millum kvinnur og menn. Tað var samgongan millum Javnaðarflokkin, Tjóðveldi, Sjálvstýrisflokkin og Kristiliga Fólkaflokkin. Men har kom sperðil í. Tað var málið um 266b, sum órógvaði so illa. Tað var broytingin í revsilógini um, at tað skuldi verða bannað at happað fólk fyri at verða samkynd, sum skapti stóra øsing um siðloysi, sum eisini gekk út yvir javnstøðulógina.
Tá rokið um 266b var við at leggja seg í 1988, varð málið um javnstøðulógina lagt fram. Men hetta »siðloysi« vildi Kristiligi Fólkaflokkurin heldur ikki vera við til.
Flokkurin kravdi, at løgmaður tók uppskotið aftur.
Tað vildi Atli Dam ikki hoyra talan um.
Vildi Kristiligi Fólkaflokkurin ikki vera við til at fremja javnstøðu millum kvinnur og menn á hendan hátt, so mátti flokkurin heldur fara.
Og soleiðis bleiv tað. Kristiligi Fólkaflokkurin fór úr samgonguni – og hin helvtin av flokkinum, sum var farin í tvíningar, Adolf Hansen, kom upp í samgonguna í staðin.
Adolf Hansen hevði tá stovnað Framsóknarflokkin, og landsstýriskvinna fyri Framsókn gjørdist Karolina Petersen.
Men javnstøðulógin mátti bíða. Tingmenn hildu tað vera siðloysi og ógudiligt at fremja javnstøðu millum menn og kvinnur við lóg...
...Og Ikki fyrr enn seks ár seinni, var løgtingið búgvið til at samtykkja javnstøðulógina. Tað gjørdi Løgtingið tann 15. apríl í 1994 við atkvøðunum hjá øllum samgongutingfólkunum uttan Lassa Klein og hjá andstøðutingfólkunum Birgiri Danielsen úr Fólkaflokkinum og Lisbeth L. Petersen úr Sambandsflokkinum.
Úr gerðabókini hjá Løgtinginum:
3. viðgerð av tingmáli nr. 122/1993: Løgtingslóg um javnstøðu millum kvinnur og menn.
Lógin sum samtykt við 2. viðgerð endaliga samtykt við 18-6-5-3 atkvøðum. Atkvøtt varð við navnakalli soleiðis:
Ja atkvøddu:
Birgir Danielsen
Lisbeth L. Petersen
Heini Johansen
Sommer Winther
Frank Davidsen
Manne Næs
Jógvan A. Johannessen
Vilhelm Johannesen
Sverre Midford
Henrik Old
Jacob Lindenskov
Dan Petersen
Karl Heri Joensen
Helena Dam á Neystabø
Hans Tausen Olsen
Hergeir Nielsen
Heini O. Heinesen
Hildur Patursson
Nei atkvøddu:
Óli Breckmann
Svend Aage Ellefsen
Anfinn Kallsberg
John Petersen
Niels Pauli Danielsen
Tordur J. Niclasen
Atkvøddu ikki:
Jógvan Sundstein
Finnbogi Arge
Flemming Mikkelsen
Jógvan Ingvard Olsen
Lasse Klein
Burturstaddir:
Olaf Olsen
Terje Davidsen
Edmund Joensen
Málið avgreitt.
