Breiðablik vann í dag stórsigur 4-0 á uppflytaraliðnum, Vestri á Kópavogsvøllinum í Kópavogi. Vestri megnaði at halda málið reint í fyrra hálvleiki, men í seinna hálvleiki fekk Breiðablik gongd á málskjótingina.
Tá 82 minuttir vóru leiktir av dystinum hendi nakað sera gleðiligt. Patrik Johannesen kom á vøllin fyri Breiðablik í sínum fyrsta kappingardysti í nærum eitt ár.
Fyrst í maj í fjør sleit Patrik Johannesen krossbandið, og so var kappingarárið í Breiðablik liðugt hjá Patriki.
Og aftaná Patrik kom á vøllin í dag økti Breiðablik til bæði 3-0 og 4-0.
Daniel Obbekjær, ið spældi við 07 Vestur í fjør fekk sín fyrsta kappingardyst fyri Breiðablik í dag. Obbekjær kom á vøllin tá 66 minuttir vóru leiktir av dystinum.
Breiðablik er fyribils fremst í bestu íslendsku fótbóltsdeildini við seks stigum fyri tveir dystir.
Sunnukvøldið 21. apríl klokkan 20.15 er dúkað til føroyinga-uppgerð. Tá tekur liðið hjá Gunnari Vatnhamar - verandi greipuvinnararnir - Víkingur Reykjavík móti Breiðablik á heimavølli.
Áðrenn tað spæla Gunnar og liðfelagarnir á útivølli móti Fram. Tann dysturin verður í ovurmorgin klokkan 20.15.
