Níggju tey seinastu árini hevur KÍ vunnið í Gundadali

Klassikarin millum javnaldrarnar HB og KÍ verður seinnapartin í Gundadali. Í ársins fyrsta fótbóltsdysti var KÍ í Gundadali, har steypavinnararnir í HB vunnu 3-2.

Tølini siga, at klaksvíkingar trívast væl í Gundadali. Soleiðis hevur tað verið nýggja tíðarskeiðið, sum hevur verið í KÍ, síðani Mikkjal Thomassen var venjari.

Sum oftast hevur KÍ verið tríggjar ferðir um árið í Gundadali og spælt landskappingardyst, og tølini siga, at síðani 2015 er tað ikki komið fyri, at KÍ eitt og sama ár er farið úr Gundadali uttan sigur ímóti HB ella B36 ella báðum høvuðsstaðarfeløgunum.

Tað er møguleiki fyri, at góða gongdin seinastu nógvu árini nú verður søga. KÍ tapti í 2. umfari 2-0 ímóti B36, og í dag er tað HB, sum bíðar.

Í Klaksvík hava teir vónað, at liðformaðurin Jákup B. Andreasen fór at vera tøkur at vera við ímóti HB. Sum tað skilst, so er tað rættiliga ivasamt, um hann verður komin fyri seg eftir fótskaðan, ið hevur hildið honum burtur frá fótbólti, síðani KÍ í fyrsta umfari vann 6-0 heimasigur ímóti ÍF, og Jákup fimm minuttir undan dystarloki fór av vøllinum.

Á skaðalistanum hjá KÍ eru eisini Odmar Færø, Heini Vatnsdal og Hallur Hansson. Patrick da Silva var ikki við á Skála, tá ið KÍ skoraði 2-1 sigursmálið í síðstu sekundunum, og aðrir, ið hava haltað, eru Mads Bo Mikkelsen og Claes Philip Kronberg.

HB vann mánakvøldið tepran 1-0 sigur á Svangaskarði ímóti B68. Tá varð Mikkel Dahl skiftur inn. Hann hevur higartil verið so mikið skaðadarvaður, at hann ikki hevur verið førur fyri at spæla.

Ári Mohr Jónsson og Magnus Holm Jacobsen eru eisini á skaðalistanum, og higartil hevur  Emmanuel Agyeman Duah, sum í februar skifti úr svenska felagnum Eskilstuna og var ætlaður at fylla holið eftir Adrian Justinussen, ikki verið tøkur. Mitt í vikuni vóru loyvini hjá honum ikki komin upp á pláss.

Kelda: FaroeSoccer