Um ein góðan mánað verða teir lidnir at føra grót frá tunnilsmunnanum á Strandalandinum og til staðið, har rundkoyringin út frá tunnilsmunnanum í Rókini skal vera.
Í morgun varð flakin, sum í ódnarveðrinum síðsta vikuskifti sleit seg leysan á Strondum og rak inn til Søldarfjarðar, togaður av Strondum og yvir undir Rókalandið. Nú liggur hann á staðnum, har grót seinastu mánaðirnar er slept niður. Fyllingin er nú komin so mikið langt upp, at maskinan, sum er á flakanum, røkkur niður at arbeiða við grótinum.
Avmarking úti í sjónum ber boð um, júst hvussu langt eysturi innara síðani av rundkoyringini - ímóti Runavík - verður.
-Talan er um 70 túsund rúmmetrar av gróti – í føstum máti. Vit rokna við, at tað verður liðugt at flyta grót til rundkoyringina, sum verður norður úr ella inn úr Rókalandinum, um mánaðarskiftið februar/mars, sigur Teitur Samuelsen, stjóri í partafelagnum Eystur- og Sandoyartunlar.
Tað er grótbáturin SIRI hjá J&K Petersen, sum førir grót tvørturum Skálafjørðin. Tað ger hann í vikuskiftunum, meðan hann hinar dagarnar førir grót av Glyvursnesi og inn á Havnina, har grótið verður brúkt í sambandi við havnarútbyggingina eystarumegin.