Danska veðurstovan DMI boðar við hampuligum veðri hesa vikuna, men tað verður skýggjað stóran part av tíðini. Í løtum fer sólin at kaga fram, og hitin kemur upp í 15 stig.
DMI sigur, at í dag verða 3-8 m/s av eystri ella landnyðringi, í støðum upp í 10 m/s. Samdrigið og nakað av sirmi ella regni, møguleiki verður eisini fyri támi ella mjørka. Hitin millum 10 og 15 stig. Í nátt 5-10 m/s av landnyðringi, í støðum upp í 13 m/s. Samdrigið og regn av landsynningi. Hitin um 9 stig.
Týsdagin verða 5-10 m/s av landnyðringi. Samdrigið og regn í støðum. Út á fyrrapartin verður turt, men skýggjað. Vindurin minkar niður í 3-8 m/s. Hitin verður millum 10 og 13 stig.
Mikudagin verða 3-8 m/s av landnyrðingi. Samdrigið og turt. Hitin um dagin millum 10 og 14 stig, um náttina um 10 stig.
Hósdagin verða 3-8 m/s av útnyðringi og vestri, seinni av útsynningi. Samdrigið, men møguleiki fyri sólglottum. Hitin millum 10 og 15 stig, um náttina um 10 stig.
Fríggjadagin verða 3-8 m/s av útsynningi, í løtum verður sól. Hitin um dagin 11 til 15 stig, um náttina niður í 10 stig.