Rocky Road er upprunaliga amerikanskt góðgæti, men tað er tó meir og meir at síggja á hillunum her heima. Rocky Road er smeltað sjokoláta við alskins slagi av bomm og nøtum í - tað tykkum dáma best. Ofta verða skúmgæti og nøtir nýttar og pyntað verður við hvítari sjokolátu. Men í veruleikanum er spælið frítt. Nýt tað, tykkum dáma best.
Her er ein jólalig útgáva:
- 50 g av mandlum
- 30 g av heslinøtum
- 250 g av myrkari sjokolátu
- 75 g av skúmgæti (skumfidusum)
- 3 piparmyntu-jólastavar
Legg mandlur og heslinøtir á eina pannu og snerk tær, men tak tær av, áðrenn tær gerast brúnar. Legg tær í eitt viskistykki og gníggja, so skalið fer av helsinøtunum.
Smelta sjokolátuna.
Brót piparmyntu-jólastavarnar og rør teir í saman við skúmgætinum. Legg bakipappír á eitt fat (á leið 20x20), og legg nakað av piparmyntu-jólastavunum og skúmgætinum á botnin.
Stoyt helmingin av sjokolátini í fatið og síðani aftur piparmyntu-jólastavar skúmgæti og mandlir.
Rør lættliga og lat síðani restina av sjokolátuni omaná. Stroy restina av mandlunum, skúmgætinum og piparmyntu-jólastavunum omaná til endans. Set at kølna, sker í puntar og njót saman við onkrum, tú ert góð/ur við!
Hetta er bert uppskot. Tað riggar eisini væl við til dømis Maltesers, hvítari sjokolátu og piparkeks. Til ber at blanda tað, sum ein ynskir í sjokolátuna :)