Hann hevur ligið við kulda og ælaveðri í longri tíð. Men nú kemur broyting í í roynd og veru longu í morgin.
Veðurmaðurin í Miðlahúsinum, Petur Skeel Jacobsen sigur, at vit kunnu vænta heilt upp í 15 stig um vikuskiftið.
Góða veðrið byrjar annars longu í morgin, tá hann verður landsynningur í ættini fyrrapartin við sól, men seinnapartin regn av og á. Hitin verður millum 10 og 13 stig.
Mikudagin verður sama ætt og sama veður, men tá kunnu vit vænta hita upp í 14 stig.
- Men sjálvandi mjørki kann verða á ávísum støðum, og har verður ikki so heitt, slær Petur Skeel fast. Kanska ikki meiri enn 10 stig.
Hósdagin verður sama veður og fríggjadagin við. Men leygardagin er ikki óhugsandi, at hitastigini fara heilt upp á 15.
- Nú hevur verið kalt ivaleysa leingi. Nú treingja vit til hita, sigur Petur Skeel.
(savnsmynd: Fuglafjørður)
