Argja Bóltfelag hevur kallað inn til eyka aðalfund, eftir at tað ikki eydnaðist at manna nevndina. Millum tey, ið ikki taka við afturvali, er formaðurin Martin Dalsgarð.
- Eg havi ikki tíð at verða formaður í AB. Eg raðfesti onnur ting sum arbeiði og familju í løtuni, sigur Martin Dalsgarð, sum ikki tók við afturvali á aðalfundinum.
Hann heldur, at tað er tíðar- og orkukrevjandi at sita í nevnd í einum fótbóltsfelagi. Hóast leitað hevur verið eftir fólki at taka við, so hevur tað ikki eydnast enn.
- Um tú er ungur og hevur eitt lítið barn, so er tað krevjandi. Eg veit ikki hvør kemur í nevnd nú. Vit hava spurt okkum fyri hjá fólki rundanum AB, men ongin hevur sagt ja, sigur Martin Dalsgarð.
Aðalfundurin hjá AB var í gjár. Felagið hevur yvirskot á rokniskapinum og klárar sínar skyldur. Fimm fólk eru í starvsnevndini. Tvey hava trekt seg fyri tíð, meðan tvey tóku ikki við afturvali. Bara ein stillaði upp til nevndina, sum sostatt ikki bleiv mannað.
Nú verður nýggjur aðalfundur hósdagin 9. mars. Á skránni er bara val av starvsnevnd og varamilum. Av Argjum verður vónað, at felagið klárar at manna nevndina tá.
