Alivinnan togar føroyska búskapin uppeftir

Í fjør var føroyska bruttotjóðarúrtøkan 14.344 milliónir krónur, og tað eru 686 milliónir meiri enn í 2012.

Hetta vísir ein fyribils uppgerð hjá Hagstovuni.

Men uppgerðin vísir eisini, at meiri enn helmingurin av vøkstrinum stavar frá alivinnuni

- Virðisøkingin í fiskaaling meira enn tvífaldaðist í fjør, sigur Hagstovan. Men tað er eisini vøkstur í flestu øðrum vinnugreinum, uttan í fiskiskapi.

- Eftir minkingina í 2008 og 2009 er bruttotjóðarúrtøkan í ársins prísum vaksin seinastu fýra árini.

 - Vøksturin var sjey prosent í 2010, 2,4 prosent í 2011, trý prosent í 2012 og fimm prosent í 2013.


Hagstovan sigur, at virðisøkingin í fiskaaling, vaks úr 369 milliónum í 2012, upp í 770 millónir í 2013.

- Virðið í fiskaaling minkaði bæði í 2011 og 2012, men í fjør vaks tað aftur upp um støðið í 2010.

Men vøksturin er kortini ikki veruligur, tí hann stavar so at siga allur frá hægri laksaprísum.

Annars minkaði virkið í fiskiskapi 12,1 prosent í 2013, úr 1.366 milliónum niður í 1.200 miljónir.

Afturgongdin var størst í uppisjóvarveiðuni, sløk 15 prosent.

Í feskfiskaveiðuni minkaði virðið sløk 13 prosent, úr 340 miljónum niður í slakar 300 milliónir.

Parturin hjá feskfiskaveiðuni av virðisøkingini í allari fiskiveiðuni, er minkað úr umleið 55 prosentum niður á 25 prosent seinastu 10 árini.


Virðisøkingin í matvøruídnaði vaks 6,8 prosent, áleið sami vøkstur sum í 2012.

Tað var virkingin av uppisjóvarfiski, sum gjørdi allarmesta munin í fjør. Eisini annar ídnaður hevði framgongd í fjør.

Og virðisøkingin í byggivinnuni vaks nakað aftur í 2013 eftir eina minking í 2012.

Vøksturin í almennari fyrisiting og tænastu var góðar 100 miljónir, 3,9 prosent.

Hetta er nakað meir enn árini 2009-2012, men væl minni enn vøksturin mongu árini frammanundan.

Miðalvøksturin í almennari fyrisiting og tænastu árini 1999-2009 var góð 7 prosent um árið.


Í øðrum tænastuvinnum vaks virðisøkingin 4,8 prosent í 2013, væl minni enn árið fyri.

Her stavar vøksturin serliga frá sjóflutningi seinastu bæði árini, sigur Hagstovan.

Privatar tænastuvinnur eru handil og umvæling, gistihús- og matstovur, flutningur og samskifti, fígging og trygging, kunningartøkni, fastognaumsiting og aðrar handilsligar tænastuvinnur.