- Allir yvirgangsmenninir, sum doyðu í bardøgunum í Mumbai, vóru úr Pakistan, segði stjórin í indiska innanríkisráðnum, Shakeel Ahmad, við bretska kringvarpið BBC í morgun. Hann legði afturat, at India skuldsetir ikki pakistonsku stjórnina fyri at hava stuðlað yvirgangsmonnunum.
Samstundis hava indisku myndugleikarnir upplýst, at 172 fólk doyðu í yvirganginum, og at næstan 300 vórðu særd.
Indiska tíðindastovan PTI skrivaði í gjár, at fleiri limir í indisku stjórnini hava hug at slíta friðarsamráðingarnar við Pakistan. PTI visti eisini at siga, at Manmohan Singh, forsætisráðharri, er sera vónsvikin av, at Pakistan ikki ger meiri fyri at forða yvirgangi ímóti India.
Ajmal Qasab, tann einasti yvirgangsmaðurin, sum bleiv tikin á lívi, er úr Pakistan, og sambært indiskum keldum hevur hann greitt løgregluni frá, hvørjir felagar hansara vóru. Hann skal eisini havt sagt, at hann var í venjingarlegu hjá pakistanska felagsskapinum Lashkar-e-Taiba, sum berjist ímóti tí indiska stýrinum í Kashmir.
Pakistanski forsetin, Asif Ali Zardari, hevur inniliga heitt á India um ikki at revsa Pakistan fyri atsóknina at Mumbai. Hann segði í gjár, at teir hernaðarligu felagsskapirnir í økinum eru so sterkir, at teir kunnu elva til kríggj millum londini bæði.
- Vit liva í einari truplari tíð, har óalmennar kreftir hava elvt til kríggj sum t. d. atsóknin at USA 11. september í 2001, segði Zardari. Hann hevur fyrr sagt, at Pakistan fer at revsa teir seku, um tað kann prógvast, at nakar í Pakistan hevði samband við yvirgangin í Mumbai.
