Tað er meir og meir, sum bendir á, at Arnbjørn Hansen heldur fram í EB/Streymi. Tað er ongin loyna, at HB hevur víst áhuga fyri framherjanum. Eisini Víkingur hevur havt ein fyrispurning frammi hjá landsliðsleikaranum. HB hevur sett at gott lið saman, men mangla ein framherja. Helst bíða teir eftir støðuni hjá Gilla Sørensen, sum er í AaB í løtuni. Hann er ikki beinleiðis framherji, men hevði verið ein góð loysn eisini.
Fíggjarliga støðan í EB/Streymi er framvegis eitt sindur ógreið, men tað kundi verið líkt til at felagið er í eini støðu til at halda fast í Arnbirni Hansen.
Hingartil hevur ongin spælari sagt farvæl við føroyameistarnar, men tað tykist fyri vist, at Sorin Anghel spælir við AB komandi kappingarár.
Blé ikki í Víkingi
Vit skrivaðu fyri kortum, at Evrard Ble helst heldur fram í Víkingi, men tað tykist vend vera komin í samráðingarnar teirra millum. Tí er ikki ósannlíkt, at fílabeinsstrandingurin ikki heldur fram í Víkingi.
Ein upplagdur avloysari kundi verið Ndende, sum hevur spælt við B68 seinnu árini. Eisini kundi hugsast, at Jann Ingi Petersen er upp á tal í Víkingi. Hann hevur boðað frá, at hann ætlar at spæla í bestu deildini og stríðast fyri einum landsliðsplássi. Hann hevur ikki funnið sær eitt nýtt felag enn.
Gøtumaðurin, Súni Olsen, boðaði í Sosialinum mikudagin frá, at hann heldur fram í B36 komandi kappingarár, sjálvt um felagið møguliga ikki kemur at verða eins kappingarført í oddinum, sum tey bæði seinnu árini.
Lukasz Cielsewicz hevur sáttmála fyri komandi kappingarár, men okkurt bendir á, at tað ikki er heilt vist um hann heldur fram.
