Asbjørn Heðinson og 07 Vestur hava undirskrivað sáttmála, og ungi sandavágsmáðurin er sostatt aftur í barndómsfelagnum, úr AB, har hann spældi í ár, boðar 07 Vestur frá.
- Ungi miðvallarin, sum fyllir 20 leygardagin, fekk longu gjøgnumbrot sítt á besta liði okkara í 2017, í Betri deildini, sum bert 16-ára gamal. Síðan eru tað blivnir 62 dystir í Betri deildini, fyri okkara lið, og fyri AB, har hann leikti í ár. Asbjørn, hóast enn rættiliga ungur, hevur nógv at bjóða okkum, við royndum úr Betri deildini í ár, og vit fegnast um, at hann hevur valt at spæla her vesturi aftur, skrivar 07 Vestur í tíðindaskrivi.
07 Vestur er flutt upp aftur í bestu deildina. Felagið hevur longu fingið tilgongd av Silasi Eyðsteinsson, sum eisini hevur spælt við AB.
