Í dag hava allar tær gomlu deildirnar hjá Amagerbanken broytt navn til BankNordik. BankNordik verður nú ein sjónligur banki í høvuðsstaðarøkinum í Danmark og ætlar at styrkja sína støðu í økinum.
Tann 1. juli í ár yvirtók BankNordik sunnu partarnar av Amagerbanken og kundi harvið bjóða umleið 82.000 privatkundum og 10.000 vinnukundum vælkomnum. Síðani hevur bankin lagt nakrar deildir saman í størri eindir fyri at styrkja førleikarnar í deildunum. Samstundis eru nýggir deildarstjórar útnevndir, og starvsfólk bankans fleiri teirra úr Føroyum hava arbeitt miðvíst fyri at tryggja eitt gott og smidligt skifti til BankNordik fyri mongu nýggju kundarnar.
Nú er BankNordik eisini vorðin sjónligur í býarmyndini í Keypmannahavn. Mánadagin 28. november fekk Amagerbanken navnið og búmerkið hjá BankNordik.
- Nú fáa vit eitt nýtt og sterkari støði at kappast á, sigur Janus Petersen, forstjóri í BankNordik.
