Besta føroyska matstovan, hevur nú fingið eitt sjáldsamt høvi at vísa føroyskt matkynstur fram úti í heimi.
Tað hendir nú Koks er bjóðað at vera gestamatstova í matstovuni, Ikarus, í Salzburg í Eysturríki, í februar.
Ikarus, sum er ein Michelin matstova, heldur til í einum hangari á flogvøllinum í Salzburg, og hon má sigast at vera sjálv ímyndin av alheims matgerðini, siga tey í einum tíðindaskrivi.
Og nú siga tey, at tey fata at bjóða gestum sínum úr øllum heimi tann framúrskarandi matin, Koks borðreiðir við.
Tey í Ikarus bjóða hvønn mánað stjørnukokkum ymsastaðni frá í heiminum at gera mat í Ikarus. Talan er um kokkar við bæði einari, tveimum og trimum michelinstjørnum, so tað má sigast at vera ein rættilig viðurkenning, tá ið tey nú bjóða Koks at vera gesta matstova á Ikarus í februar.
Í tíðindaskrivinum sigur køksleiðarin í Ikarus, Martin Klein, at hann hevur ikki bara bjóðað Koks í Ikarus, tí norðurlendsk matgerð er rættiliga væl dámd í Eysturríki. Hann fegnast serliga um, at norðurlendsk matgerð eisini er at finna uttan fyri Keypmannahavn.
Sjálvur hevur Martin Klein verið á Koks í eina viku og arbeitt saman við Poul Andrias Ziska, høvuðskokki á Koks, fyri at skilja hugsjónina, hendan sermerkta, føroyska matstovan, byggir á.
Ikarus hevur gestir úr allari verðini og nú vil kokkurin fegin eisini geva teimum smakkin av Koks, sigur hann.
