Á lansdfundinum hjá Fiskimannafelagnum í 2024 varð einmælt samtykt at ganga frá økisvaldum nevndarlimum, sum stóðu uppá var triðja hvørt ár, til at velja allar nevndarlimirnar beinleiðis á landsfundinum.
Broytingin hevur tað við sær, at veljast skulu heili seks nevndarlimir á valinum á landsfundinum í ár, og soleiðis verða eingi valkort send út, sum tað higartil hevur verið.
- Við hesi broyting eru bæði gamla sóknarformansskipanin og nú eisini sýsluformansskipanin farnar í søguna, tí nú skulu nevndarlimirnir veljast á sjálvum landsfundinum.
Formaðurin sigur, at hetta er ein liður í menningini av felagnum og valskipanini av nevndarlimum felagsins.
Í ár verður landsfundurin í Føroya Fiskimannafelag hildin í Løkshøll í Runavík og fundurin, sum verður hin 27. desember, byrjar klokkan 12.
Tað er millum jóla-og nýggjárshøgtíðina, at flestu fiskimenn eru heima, og tí hevur eisini verið hildið, at hetta er besta tíðin til at halda landsfund.
Felagsformaðurin, Jan Højgaard, ásannar, at fólk eru ikki so hugagóð, tá ræður um at møta til fakfelagsfundir, men hann vónar, at uppmøtingin verður góð á landsfundinum komandi.
- Hetta, at flyta fundin úr Havn til Runavíkar, er so eisini ein roynd at koma nærri mið-og norðurøkinum, Skálafjørðinum, Gøtu, Fuglafirði, Leirvík og Norðoyggjum, har stór mongd av skipum og fiskimonnum eru.
Brosandi heldur hann fyri, at nú verður tað so ikki fjarstøðan, sum fer at halda fiskimonnum aftur at møta á landsfundi, tó at lítil fjarstøða eftirhondini er í miðøkinum, nú ferðasambandið er vorðið so gott og høgligt.
Nú skulu so seks nevndarlimir veljast á komandi landsfundi.
- Komandi trý árini verða ein skiftistíð fyri teir seks valdu nevndarlimirnar. Eftir at skiftistíðin er eru farin, fara tveir nevndarlimir altíð at standa fyri vali á landsfundi felagsins.
Jan Højgaard sigur, at hetta við beinleiðis nevndarvali á landsfundinum hevur verið ein long tilgongd, tí tað hevur verið trupult at fáa menn at skilja, at gamla skipanin við sýsluformansvali ikki riggaði longur.
- Men, nú komu vit so á mál við beinleiðis vali á landsfundinum, og tað fegnist eg um, leggur felagsformaðurin aftrat.
Hann heitir á fiskimenn um at møta á landsfundinum í Løkshøll hin 27. desember klokkan 12.
