Seinasta freist at boða frá luttøku á eykaaðalfundi hjá Ognarfelag Tryggingartakaranna, sum eigur Tryggingarfelagið Føroyar, er í morgin. Eykaaðalfundurin verður 4. januar.
Á skránni eru viðtøkubroytingar.
Ognarfelag Tryggingartakaranna, sum eigur Tryggingarfelagið Føroyar, lýsir til eykaaðalfundi 4. jan. 2012 við viðtøkubroytingum á skránni. Seinasta freist hjá tryggingartakarunum at tryggja sær rætt til at møta er við skrivliga at boða frá luttøku í seinasta lagi 5 dagar undan aðalfundinum, sigur Johan Petresen, tryggingartakari.
Hann vísir á, at ímillum allar jólalýsingarnar í Dimmalætting 19. desember á síðu 22 er at finna ein ¼-síðulýsing frá Ognarfelag Tryggingartakaranna, har boðað verður frá eykaaðalfundi at verða mikudagin 4. januar 2012 klokkan 18.00 á Hotel Hafnia.
Sagt verður eisini frá, at dagsskráin er vitøkubroyting um valbæri til umboðsráðið, um at víðka umboðsráðið frá 23 til 35 limir og um at stytta valskeiðið fyri nevndfarlimir frá 4 til 2 ár. Eisini er ymiskt á skránni.
Men fyri at kunna møta í egnum felag, skal eigarin ella tryggingartakarin, sum hann verður nevndur í lýsingini, boða skrivliga frá í seinasta lagi 5 dagar frammanundan, tvs. í seinasta lagi í morgin fríggjadagin 30. des. So fær hann rætt at møta á eykaaðalfundinum, men hevur ikki atkvøðurætt. Møguliga fær hann talurætt, so leingi orðstýrarin gevur honum loyvi til tess, vísir Johan Petersen á.
Tryggingartakari kann skrivliga boða frá luttøku á trygging.fo
