Í eina løtu seinnapartin í gjár var Sandoyartunnilin stongdur.
Vaktleiðarin á løgreglustøðini í Havn visti í morgun at siga, at tað er ein sjálvvirkandi skipan, sum ger, at bummarnir fara niður, um okkurt er á vási.
Men, tað var tó skjótt, at tey vóru greið yvir, at talan var um eitt tekniskt brek, og eftir minni enn hálvum tíma fóru bummarnir uppaftur.
Í undirsjóvartunlunum eru nógv tøkni, og her eru nógvir følarar, og í hesum førinum var talan um eitt brek á einum følara.
- Tunnilin er fullur av tøkni, og her eru hópin av vakmyndatólum og følarum av ymiskum slag. Vit síggja soleiðis hvønn metur í tunlinum á skíggja.
Vaktleiðarin visti at siga, at einki sást til, at nakrir trupulleikar vóru í tunlinum, og tað vísti seg eisini, at talan var um eina feilfráboðan frá einum følara.
Lagt verður aftrat, at hendingin í gjár vísti eisini, at sjálvvirkandi skipanin við, at bummarnir fara niður, um fráboðanir koma, virkar sum hon skal.
