Tað rakk akkurát ikki hjá Danmark í kvøld, tá teir spældu fjórðingsfinalu í HM endaspælinum í Qatar.
Danmark tapti dystin móti Spania 25-24, eftir at tað í hálvleikinum stóð á jøvnum 11-11.
Sum heild var talan um javnan og ferðmiklan dyst, sum ikki varð avgjørdur fyrrenn í seinastu sekundunum, tá spanski leikarin, Joan Canellas fekk skotið úti frá til endaliga úrslitið 25-24.
Spania er tískil klárt til hálvfinaluna í HM endaspælinum, meðan Danmark við fullari vissu onga medalju fær við sær úr Qatar. Ístaðin skal Danmark spæla plaseringsdyst í vikuskiftinum.
Í hinari fjórðingsfinaluni vann Frakland ein greiðan sigur móti Slovenia, og eru fraklendingar sostatt eisini klárir til hálvfinaluna.
Teir báðir dystirnir í hálvfinaluni eru tí hesir:
Pólland – Qatar
Spania – Frakland
Úrslitini í kvøld:
Spania – Danmark 25-24 (11-11)
Slovenia – Frakland 23-32 (10-18)
