– Eg eri spentur til næstu vitjan mína í Føroyum. Um ikki fyrr, so dýra biðidag 26. apríl, tá eg gleði meg til at sita í eini føroyskari kirkju og senda eina kerliga heilsan til donsku stjórnina.
Soleiði skrivaði Morten Messerschmidt í eini tíðargrein í Sosialinum í summar.
Vit hava spurt Morten Messerschmidt, um hann kemur til Føroyar dýra biðidag.
– Jú, tað er júst tað eg geri. Eg komi hósdagin og fari í kirkju dýra biðidag, sigur hann.
Í tíðargreinini vísti hann á, at kristindómurin og kirkjan framvegis hava ein týðandi leiklut í føroyska samfelagnum, sum ikki kann samanberast við viðurskiftini í Danmark, har stjórnin avtekur halgidagar, og har prestar mangan misskilja viðurskiftini millum Guds og keisarans og føra beinleiðis propaganda.
– Í Føroyum halda tit í trúskapi til kirkju og mentan fast í siðunum – eisini dýra biðidegi. Tað tosar til hjartað hjá mær.
– Eitt errið land avtekur ikki sínar halgidagar. Men fagnar teir og elskar teir, sigur Morten Messerschmidt, sum kemur til Føroya í morgin og sum fríggjadagin, dýra biðidag, fer í kirkju í Føroyum.
