Hóast semingsroyndirnar millum Pedagogfelagið øðrumegin og Fíggjarmálaráðið og Kommunala Arbeiðsgevarafelagið hinumegin eru endaðar úrslitaleysar, so verður ikki verkfall. Í hvussu er ikki enn.
- Nei, nú verður jólafriður í menniskjum góður tokki, sigur Maud Wang Hansen.
Forkvinnan í Pedagogfelagnum fer í morgin at kunna sínar umleið 2000 limir um støðuna og hvat skilir partarnar, eftir at semingsmenninir hava tveitt handklæðið í ringin.
Les eisini: Semingsmenninir hava kastað frá sær
Tað eru nú tvær vikur, síðani semingsmenninir vóru boðsendir, hóast partarnir tá at kalla vóru komnir á mál. Sambært Pedagogfelagnum tók ósemja segr knappliga upp um útrokningarnar í samband við at farast skal frá at rokna viðbøturnar fyri ólagaliga arbeiðstíð út í krónum og oyrum, í staðin fyri at rokna tær í prosentum av lønini.
Nú, tvær vikur seinni, tveita semingsmenninir sum nevnt handklæðið í ringin.
- Tað skal ikki vera nøkur loyna, at sera lítið er á borðinum at samráðast um. Men vit hava tó nøkur prinsipp, ið vit halda fast um, sigur Maud Wang Hansen.
Forkvinnan í Pedagogfelagnum hevur í fleiri førum eftirlýst og tosað hart fyri at arbeiðið hjá hennara limum fær hægri virðing í samfelagnum og at hetta eisini sæst aftur í eini veruligari lønarhækkin. Men tann eftirlýsingin er send út í tóman heim.
- Ja, eg má bara ásanna, at politiska skipanin hevur ongan áhuga í at lyfta lønina fyri námsfrøðiliga arbeiðið hægri upp, sigur Maud Wang Hansen og heldur fram:
- Bæði landsstýrið og kommunurnar siga seg annars arbeiða við at fáa fólk at støðast í hesum landinum, eitt nú vit stóra átakinum ”vit velja Føroyar.” Men hetta er eftir øllum at døma ikki galdandi fyri okkara fak, sum verður munandi verri lønt her í Føroyum enn í okkara grannalondum, sigur Maud Wang Hansen.
Nú semingsmenninir hava blakað frá sær er einki samband millum partarnar. Og tað verður tað neyvan heldur fyri nýggjár.
- Nei, vit taka so ikki nakað initiativ enn. Nú kunna vit okkara limir og halda so jólafrið, sigur Maud Wang Hansen.
Les eisini: Semingsmenninir hava kastað frá sær
