Uppskotið er rætt, tí tað skapar eina valskipan, har allar atkvøður viga líka. Landafrøðiliga umboðanin í verandi valskipan er minni viðkomandi í dag, nú landið nærum alt er bundið saman, og virkar sum ein búskaparlig eind.
Skulu vit menna okkum sum nútímans samfelag er neyðugt at hugsa heildarliga – og fyrsta treytin fyri tí er eitt ting, sum arbeiðir fyri skilagóðari útbygging um alt landið og á øllum samfelagsøkjum.
Halda vit fram við verandi skipan, fer tað at tálma framburðinum, tí hugsað verður fyrst og fremst lokalt og ikki um heildina. Vit síggja alt ov ofta, at avgerðir mangan verða órationellar, og merktar av negtivari motivatión. Viðhvørt velur tingið heldur onki at gera, enn at gera nakað í miðstaðarøkinum, og ótald dømi eru um evni, sum ongatíð koma á dagskránna av somu orsøk. Ein landsplanur – ella skipað útbyggingarætlan í høvuðsheitum fyri alt landið - er bert eitt dømi.
Vit mugu koma burtur úr hugsanini um, at miðstaður og útjaðari eru mótsetningar. Pláss er fyri báðum, og landinum tørvar bæði. Landið hevur ikki ráð til, at vit hugsa um okkum sjálvi í mótsetningum. Eitt miðstaðarøki við framburði gevur fíggjarligan møguleika fyri struktureraðum útjaðarapolitikki. Heildarhugsan ger tað møguligt.
Tá Føroyar verða eitt valdømi, sleppa vit undan smákegli um smámál á tingi, bara fyri at onkur einstakur tingmaður kann markera seg í mun til onkran pinkalítlan part av valdømi sínum. - Og fólk eru alt annað enn býtt, tey gjøgnumskoða glantrileikin, og teimum leiðist við slíkt.
Enn eru nøkur tingfólk, sum ikki kunnu ella vilja síggja teir møguleikar og tær avbjóðingar, sum liggja í nýggju skipanini við einum valdømi, men neyðhalda í verandi skipan. Tað er oftast so, at mong ikki evna at síggja møguleikarnar í menningini, og tí eru ímóti øllum. Men hesi afturhaldsfólkini eru ofta skjót at taka broytingarnar til sín, tá bert onnur hava lagt rygg til at gjøgnumføra tær.
Tí er mín áheitan á framskygda meirilutan, sum eftir øllum at døma longu er á tingi: Latið ikki afturhaldskropparnar kúga tykkum, latið ikki henda møguleika detta tykkum av hondum, men skipið Føroyar sum eitt valdømi.
