Svenskir løgreglumenn, hermenn og umleið 200 sjálvboðin hava síðani leygardagin leutað eftir teirri 10 ára gomlu Engla Juncosa-Höglund, sum hvarv, eftir at hon hevði vant fótbólt í Stjärnsund, sum er í Dalarna nakað vestan fyri Gävle.
Síðani Engla hvarv, hevur signalið frá fartelefon hennara verið tað einasta tekinið frá henni. Tað vísti, at telefonin var inni í einum skógi, men signalið var so mikið veikt, at tað bar ikki til at siga neyvt, hvar telefonin var. Í nátt slóknaði signalið, og løgreglan heldur, at battaríið í telefonini er tømt.
Løgreglan í Stjärnsund heldur ikki, at Engla er vilst í skóginum.
- Var hon vilst, høvdu vit havt funnið hana. Eg haldi, at vit jagstra ein burturflytara, sigur ein talsmaður hjá løgregluni við Aftonbladet.
Í gjár leitaðu løgreglumenn, hermenn, fólk hjá heimaverjuni og ein hópur av sjálvbodnum eftir teirri 10 ára gomlu gentuni.
- Vit leita allastaðni, og vit leita bæði eftir gentuni og øðrum, sum kann hava týdning so sum ein húgva ella ein vøttur, sigur Knut Jensen hjá heimaverjuni við Aftonbladet.
Spor av bili
Sunnudagin varð súklan hjá Englu funnin. Hon lá inni í skóginum, og tað fekk løgregluna at halda, at onkur hevur burturflutt gentuna. Løgreglan fann eisini spor frá einum bili. Tey kunnu stava frá bilinum hjá einum møguligum burturflytara, men tað er tó ikki vist, at sporini hava nakað við álopið at gera.
Sambært blaðnum Expressen hevur løgreglan illgruna um, at Engla kann vera fjald í einum húsum í grannalagnum, og tí hevur løgreglan kannað næstan hvørt einasta hús har á leiðini, men uttan úrslit.
