Europeiska Samveldið (ES) væntar búskaparligan vøkstur á 4,8 prosent í ár.
Tað vísir ein nýggj frágreiðing frá ES nevndini.
Búskaparligu útlitini eru betri nú, enn tey vóru fyrr í ár, og ES roknar við, at í fjórða ársfjórðingi verður búskapurin í ES á sama støði sum áðrenn koronu.
Ritzau skrivar, at framgongdin botnar í, at lægri smittutøl og færri innleggingar gera, at ES londini kunnu linka tilmælini í sambandi við koronu. Hetta fer at hava við sær framgongd í vinnum, sum hava verið harðast raktar av koronu – eitt nú ferðavinnuni, matstovuvinnuni og hotellvinnuni.
ES sigur, at lond við stórari ferðavinnu – Spania, Grikkaland og Portugal – hava verið harðast rakt av koronufarsóttini.
(Mynd: Ritzau Scanpix)
