Fyrr í dag leiktu tvey føroyingalið fyrra Play Off dystin um at røkka bólkaspælinum í EHF European League.
Ísak Vedelsbøl (myndin) og liðfelagarnir í Sävehof vunnu á útivølli stórsigur 33-24 á Malmö. Í steðginum var Sävehof frammanfyri 18-14. Ísak skoraði eitt mál.
Returdysturin verður leiktur í Partille komandi leygardag klokkan 15.15.
Vilhelm Poulsen og liðfelagarnir í Hannover-Burgdorf vunnu á heimavølli stórsigur 37-27 á norðurmakedonska liðnum, Alkaloid. Í steðginum var Hannover frammanfyri 19-15. Vilhelm var ikki millum málskjúttarnar hjá Hannover.
Returdysturin verður leiktur í Norðurmakedonia komandi leygarkvøld klokkan 18.30.
Stjarnan við Jóhannes Bjørgvin á liðnum royndi seg á útivølli móti rumenska liðnum, Minaur Baia Mare.
Stjarnan megnaði flottan javnleik 26-26. Í steðginum var rumenska liðið á odda 15-14.
Jóhannes var við fýra málum upp á fimm málroyndir millum næstbestu málskjúttarnar hjá Stjörnuni.
Komandi leygardag klokkan 14 tekur Stjarnan móti Minaur Baia Mare á heimavølli.
Venjari hjá Minaur Baia Mare er portugisiski Nuno Farelo, ið var venjari hjá VÍF, tá Jóhannes spældi við VÍF.
Tróndur Mikkelsen og liðfelagarnir á svenska liðnum fingu eisini eitt gott útgangsstøðið á útivølli móti pólska liðnum, Chrobry Glogow.
Tað eydnaðist HF Karlskrona at vinna 33-30, og fáa eitt sera gott útgangsstøðið til returdystin. Í steðginum var Karlskrona á odda 16-12.
Tróndur skoraði fýra mál fyri Karlskrona.
Komandi leygardag klokkan 17 verður returdysturin móti Chrobry Glogow leiktur í Karlskrona.
Elias Ellefsen á Skipagøtu og liðfelagarnir í THW Kiel hava longu tryggjað sær pláss í bólkaspælinum. So er at krossa fingrar fyri, at liðini hjá Ísaki, Vilhelmi, Tróndi og Jóhannes eisini megna at vinna seg í bólkaspælið.
