Í fjør fingu ikki færri enn fýra milliónir europearar matvøruhjálp frá Reyða Krossi, og tað var ikki bara har suðuri í Europa, tí í tilsamans 20 europeiskum londum eru fólk so fátæk, at teimum tørvar hjálp til at breyðføða seg.
Ikki síðani seinna heimsbardaga hevur Reyði Krossur deilt út so nógva matvøruhjálp sum nú, sigur Anders Ladekarl, aðalskrivari í danska Reyða Krossi, við danska kringvarpið, DR.
Fyrr var tað meira vanligt í Europa, at tað vóru innflytarar og serliga hóttir bólkar, ið fingu eina hjálpandi hond frá Reyða Krossi, men seinnu árini er tey, ið hava tørv á hjálp, blivin nógv fleiri í tali og eru hartil ikki nakar ávísur bólkur av menniskjum.
