Sum nú er, kunnu bilførarar við vanligum B koyrikorti draga ein kampingvogn, sum vigar meira enn 750 kg, har samlaða loyvda heildarvektin á vognraðnum ikki fer upp um 3.500 kg. Hetta er treytað av, at bilurin lógliga kann draga kampingvognin og at loyvda heildarvektin á kampingvogninum ikki er meira enn eginvektin á bilinum við ískoyti av 50 kg. Fer samlaða loyvda heildarvektin á vognraðnum upp um 3.500 kg og loyvda heildarvektin á kampingvogninum er meira enn 750 kg, so skal førarin hava BE koyrikort.
Nýggjar ES-ásetingar um koyrikort koma í gildi 19. januar 2013, har tað millum annað krevst BE-koyrikort fyri at geva bilførara loyvi til at draga ein hvønn kampingvogn. Politiskt er spurningurin ikki viðgjørdur í Føroyum enn, men vanliga plaga vit at laga okkum til ES-reglurnar. Umleið 500 kampingvognar eru í Føroyum.
BWH
