Noreg hevur fleiri herfólk á amerikansku Ain-al-Asad-herstøðini í Irak, og nú USA hevur lopið á Iran við bumbum, er vandi fyri, at støðin í Irak verður álopin.
Ain-al-Asad-støðin, sum liggur í vestara parti av Irak, er fleiri ferðir áður álopin úr Iran.
- Her eru út við 30 norsk herfólk, og nú vandin fyri álopum er øktur, eru trygdartiltøkini á støðini eisini herd.
Hetta upplýsir norski obertsloytnanturin, Lars Strøm, yvirfyri www.tv2.no
Hann vísir á, at norsku herfólkini á støðini hava tað gott, og tey loysa dagligu uppgávurnar innan rammurnar av nýggju trygdartiltøkunum.
- Vit fylgja støðuni neyvt, leggur obertsloytnanturin aftrat.
Tormod Heier, sum er professari í hernaðarstrategi, sigur við norska sjónvarpið, at trygdartiltøkini byggja á tær royndir, sum norsku herfólkini gjørdu sær í Iran í januar 2020.
Hetta var eftir, at USA hevði framt álop á Qasem Soleimani, sum var leiðari fyri iransku kollveltingarhyrðuni.
USA beindi fyri leiðaranum við dronum, og eftir álopið á Qasem Soleimani sendi Iran rakettir eftir amerikanskum støðum í Irak, har norsk og amerikansk herfólk vóru.
- Tá fingu fleiri amerikansk herfólk løstir. Tað, sum nú verður gjørt, er, at størri trygdartitøk eru sett í verk til tess at tryggja herfólkini, sigur Tormod Heier, professari í hernaðarstrategi.
