Hóast landsstýrið valdi at taka stuðulin til avlamisbil frá fólki við rørslutarni – tí at ein bilur er ein vanligur brúkslutur, sum flest fólk hava møguleika at ogna sær – so hava politikararnir einki í móti at lata stjórum hundraðtúsundtals krónur í stuðli til fínar og dýrar bilar
– Persónbilur er í dag mettur at vera ein vanligur brúkslutur, sum flest øll fólk hava ella hava møguleika at ogna sær.
Soleiðis segði Sirið Stenberg, táverandi landsstýriskvinna í almannamálum, tá hon legði uppskotið fram um at taka av stuðulin til fólk við virkistarni.
Skipanin var soleiðis, at latið var eitt rentufrítt lán upp í slakar 220.000 krónur, og alt eftir inntøkugrundarlagnum hjá tí rørslutarnaða, og varð so upp til helvtin av stuðulsupphæddini niðurskrivað.
Men hesa skipan, sum hevur verið galdandi í nógv ár fyri fólk við rørslutarni, tók Løgtinngið av 13. desember í 2023 við 14 atkvøðum hjá samgonguni fyri og 11 hjá andstøðuni ímóti.
Men landið stuðlar tó framvegis fólki at fáa lagaliga atgongd til bil. Men nú eru tað ikki longur tey, sum eru rørslutarnað. Men tað eru tey ríkastu, sum tjena mest, og sum eru mest forkelað av sínum arbeiðsgevara – so nógv, at hann keypir teimum ein bil til egna privata nýtslu.
Tað er tað, sum á skattamáli eitur »fríur ágóði«.
Tá eitt starvsfólk fær ein ágóða frá arbeiðsgevaranum, so er hann skattskyldugur. Um til dømis eitt starvsfólk fer eitt privat ørindi við firmabilinum, so skal starvsfólkið gjalda leigu fyri túrin, annrs er tað brot á skattalógina.
Og fær stjórin ein bil frá arbeiðsplássinum, sum hann kann nýta sum sín privata so skal hann eisini skattast av honum.
Men í hesum førum er skattaskipanin gjørd soleiðis, at hon órógvar skattin hjá stjóranum sum mist.
Hóast tað ofta er talan um sera fínar og sera dýrar bilar, so hevur tað einki at siga, tá skatturin skal gjaldast av bilinum. Tí tað verður slett ikki hugt eftir prísinum. Tað verður hugt eftir vektini! Meira bilurin vigar, meira skal stjórin rinda í skatti fyri bilin.
Man tað verður kortini ikki so dýrt fyri sjóran, sum vit kanska kundu ímyndað okkum. Stjórin rindar ongantíð meira enn umleið 3.500 krónur í skatti fyri bilin.
Skipanin er soleiðis, at arbeiðsplássið keypir bilin, rindar allar útreiðslur, eisini brennievni og umvælingar. Stjórin, sum fær bilin, rindar einki. Ikki eina einastu krónu fyri nakað sum helst. Heldur ikki fyri at vaska bilin. Hann eigur gott nokk ikki bilin. Men hann hevur bilin sum sín privata bil. Tí hann rindar skatt av bilinum.
Lesið meira um málið í Sosialinum, sum fæst í leysasølu kring landið. Haldarar kunnu lesa blaðið á sos.fo
##med2##
##med3##
