Greitt er, at fyritøkan Sp/F Knassar ikki megnar at bera íløguna, tí tann fyritøkan sambært roknskapinum er insolvent við negativum eginpeningi upp á 708.000 krónur, og at fyritøkan hevur givið hall tey seinastu seks roknskaparárini frá 2007 til 2012.
Fyri einum mánað síðan fingu Knassar eina peningainnspræning upp á 1,7 milliónir – samstuns var Poul Hansen, advokatur, valdur til nevndarformann.
Poul Hansen er kendur úr uppsjóvarvinnuni. Hann átti í Havsbrún og varð djúpt fornermaður, tá hann varð tvungin at selja sín part, tá Bakkafrost keypti felagið.
Poul Hansen er eisini nevndarformaður í P/F Uppsjóvarhavnini á Tvøroyri, har Bogi Jacobsen er stjóri. Sami Bogi Jacobsen er stjóri á Varðin Pelagic, og sami Bogi Jacobsen sigur við Portalin, har Poul Hansen er nevndarformaður, at tað er ikki pláss fyri uppsjóvarvirkinum í Fuglafirði.
Við útvarpið nýggjársaftan segði Sveinur Tróndarson, sum hevur redaktionellu ábyrgdina av Portalinum, at tað hevur ongan týdningin fyri tíðindaflutningin, hvør tað er sum eigur.
Vit kunnu staðfesta, at tað verður dult sum mansmorð, hvør veruliga eigur Portalin. Vit eru als ikki samd við redaktørinum á Portalinum. Vit halda, tað hevur stóran týdning fyri trúvirði, at lesarin sjálvur kann meta um, hvørt fíggjarlig áhugamál kunnu hava ávirkan á tíðindaflutningin.
Og Portalurin hevur skrivað nógv um uppsjóvarvinnuna – serliga hevur hann nógva positiva umrøðu av Varðanum Pelagic. Tá nú Portalurin hevur negativa umrøðu av ætlaða uppsjóvarvirkinum í Fuglafirði, so er spurningurin so nátúrligur:
– Er tað Varðin Pelagic sum fíggjar Portal.fo?
