Rættiligur gravgangur hevur verið eftir atgongumerkjum til Voxbotn 2012, síðani tað í gjár gjørdist greitt, at Medina skal framføra fyri fyrstu ferð í Føroyum til hetta tiltakið.
Tað siga fyrireikararnir í kvøld. Upprunaliga høvdu teir sett 500 atgongumerki til sølu fyri 350 krónur, og hesi eru longu øll farin.
Tað eru ikki meira enn gott eitt smdøgur síðani, at almannakunngjørt varð, at eitt nýtt tónleikatiltak verður í Vágsbotni í summar, og tí má sigast, at føroyingar hava tikið ógvuliga væl ímóti hesum forkunnuga tiltaki, sigur Rúni Djurhuus, fyriskipari.
Eg eri ordiliga kløkkur av, at so nógv atgongumerki longu eru farin, sigur hann væl nøgdur.
Stóra undirtøkan hevur ført við sær, at 500 atgongumerki aftrat sett til sølu í Kunningarstovuni í Havn, í Vodafone í SMS og á ebillett.fo.
Enn hava fólk ikki fingið løn, so tað eru nógv, sum eru hørm um, at tað ikki hevur eydnast teimum at fáa hendur á einum bíligum atgongumerki. Men hetta fáa tey so møguleika fyri nú, sigur Rúni Djurhuus.
Medina er poppdrotningin í Danmark, og hon er javnan at hoyra í føroysku loftmiðlunum.
