Tað sigur Pedagogfelagið í kvøld. Í tíðindunum í Kringvarpinum gav Jørgen Niclasen, fíggjarmálaráðharri, til kennar, at hann var sinnaður at taka uppaftur samráðingarnar.
– Hetta eru nýggir tónar úr Fìggjarmálaráðnum, tí hóast vit hava samráðst í átta mánaðir, hava vit ikki sæð landsstýrismannin eina einastu ferð, sigur Pedagogfelagið.
– Hetta er ivaleyst eisini orsøkin til, at hann er so illa upplýstur um tilgongdina, og fór so mikið skeivur í síni frásøgn um hana.
– Vit velja tó at síggja hetta sum eina jaliga útmelding, ið vónandi merkir, at Jørgen Niclasen biður síni starvsfólk á lønardeildini um at fara til veruligar samráðingar.
Vit í Føroya Pedagogfelag ynskja veruliga eina semju, ið kann vera við til at framtíðartryggja námsfrøðiliga økið, til frama fyri teir veikastu borgararnar í landinum, og øll hini, ið vit námsfrøðingar og hjálparfólk dagliga eru um, sigur Pedagogfelagið í kvøld.
