Føroyska fiskivinnan ætlar at gera nakað eyka burtur úr á heimsins størstu fiskivinnustevnu European Seafood Exposition (ESE), sum verður í Brússel í Belgia í døgunum 23. 25. apríl.
Tað verður gjørt við einum spildurnýggjum filmi um føroyska fiskivinnu, sum verður frumsýndur á føroyska básinum á ESE, undir heitinum Fresh from the Faroes
Tað er stjórin á Fiskamarknaði Føroya, Jens Christian Olsen, ið hevur tikið stig til at gera filmin, sum síðani er vorðin til í tøttum samstarvi við Føroya Ráfiskakeyparafelag og Føroya Ráfiskaseljarafelag.
- Tað er jú sera avmarkað við formligum altjóða góðkenningum sum til dømis MSC, tá tað snýr seg um føroyska fiskivinnu, og á undanfarnum ESE-messum eri eg ofta spurdur um, hvat vit so hava at vísa á í staðin. Men eg havi ikki havt nakað ítøkiligt at víst teimum. Tað hava vit nú við hesum filminum, sigur Jens Christian Olsen.
- Filmurin, sum ber enska heitið Faroe Islands Responsible Fisheries, sigur frá føroyskari fiskivinnu, hvussu hon er regulerað við atliti til stovnsrøkt og havumhvørvi, og ikki minst, hvussu føroyingar í tøttum samspæli við náttúruna gjøgnum øldir hava lært at brúka hana og hennara ríkidømi við skili, siga stigtakararnir til filmin.
