Hvussu menna vit føroyskt kappingarføri í hesum broytingartíðum?
Tað er eitt av evnunum á einari ráðstevnu, sum Eysturoyar Vinnulívsfelag skipar fyri í Løkshøll í Runavík í kvøld.
- Hetta er eitt alment tiltak um menning av føroyskum kappingarføri í einum heimi, sum er í broyting.
Fyrireikararnir siga, at tiltakið fer at seta fokus á, hvørja ávirkan broytti heimurin hevur á føroysku vinnuna, hvørjar broytingar hetta viðførir, og hvørjar møguleikar broytta støðan gevur.
- Hvørja ávirkan hevur tað á heimin, at tað er kríggj í Evropa? er ein av yvirskriftunum, sum Eysturoyar Vinnulívsfelag setir í samband við forvitnisliga tiltakið í Løkshøll í kvøld.
Fyrilestrarhaldararnar eru Dag Sletmo, leiðandi ráðgevi innan fiskivinnu í DNB, størsta bankanum í Noreg, Gorjan Nikolok, leiðandi greinari innan matvøruframleiðslu í Rabobank í Hálandi og Heri á Rógvi, búskaparfrøðingur, Lóður.
- Ráðstevnan, sum byrjar klokkan 19 og varar til klokkan 21.30, er almenn og ókeypis, verður lagt aftrat.
