Eitt nýtt eintak av tíðarritinum Frøði er komið í sølubúðirnar í dag. Eitt av evnunum í ritinum er lívshættisliga sjúkan CTD, sum útgevararnir halda ikki er væl lýst. Tíðarritið er næsta blaðið í ár.
ST hevur gjørt av, at árið 2010 skal ognast lívfrøðiligum margfeldi. Tí er sjóneykan eisini í hesari útgávuni sett á hetta evnið.
Í tíðarritinum eru fleiri greinar, sum viðgera lívfrøðiligt margfeldi við teimum avbjóðingum og møguleikum, sum kunnu standast av veðurlagsbroytingum.
- Reyði tráðurin í hesum greinum er, at margfeldi, antin tað er í ílegutilfeingi ella í ti mentanarliga, er ein styrki, sum gevur okkum meira at standa ímóti við, tá umstøðurnar broytast, sigur Føroya Fróðskaparfelag.
Í ritinum eru hugvísindaligar greinar um, hvussu siðbundna mannfólkaímyndin er hótt í framkomnu samfeløgunum, sum Føroyar eru partur av.
Hetta er evnið í aðrari av tveimum greinum um livikorini hjá børnum og ungum í dag. Hin lýsir úrslit av eini stórari norðurlendskari kanning um børn og trivnað.
Ein onnur avbjóðing, sum Frøði hesa ferð viðger, er CTD. Sjúkan er lívshættislig, um viðgerð ikki verður sett í verk.
Sambært útgevarunum av Frøði er sjúkan ikki væl lýst, tí hon er sjáldsom í heiminum yvirhøvur ? uttan í nøkrum fáum populatiónum, sum hjá okkum.
Í Frøði er eisini ein áheitan um og ein lýsing av, hvussu vit kunnu fara fram fyri at verja drunnhvítastovnin í Nólsoy ímóti teirri hóttan, sum rotta er fyri fuglin.
Nólsoy er sum kunnugt eitt av størstu drunnhvítalondum í heiminum.
Útgevari av Frøði er Føroya Fróðskaparfelag.
