Franska undirhúsið hevur atkvøtt fyri at legalisera hjálpt sjálvmorð.
Tað upplýsir tíðindastovan AFP.
Endalig samtykt liggur nakað útií framtíðini, tí lógin skal nú í senatið og síðani aftur í undirhúsið.
Lógin verður tó væntandi atkvøtt ígjøgnum og kanska innførd næsta ár.
Kanningar vísa, at yvir 90 prosent av franska fólkinum stuðlar undir at samtykkja lóggávu, sum gevur deyðasjúkum fólki, sum líða á einum støði, sum verður mett ótolandi, rætt til at doyggja.
Um lógin verður samtykt, fer hon at loyva einum læknafakligum bólki at meta um, hvørt ein sjúklingur skal hava "atgongd til eitt deyðiligt rúsevni, tá hann hevur víst ynski um tað." Hetta skrivar The Guardian.
Sjúklingurin kann so sjálvur velja at brúka deyðiliga heilivágin ella at fáa lækna ella sjúkrarøktarfrøðing at gera tað, um sjúklingurin ikki megnar tað sjálvur.
Lógin varð samtykt við 305 atkvøðum fyri og 199 ímóti. Sambært AFP gevur hon rætt til hjálp til sjálvmorð til øll fólk í Frankaríki yvir 18 ár, sum hava eina álvarsliga ella ólekjandi sjúku, sum er lívshóttandi, framkomin ella endalig.
Franski forsetin, Emmanuel Macron, kallaði atkvøðugreiðsluna í dag eitt týðandi stig.
Virkin deyðshjálp er, at ein persónur - vanliga ein lækni - stuðlar undir deyða hjá einum øðrum persóni.
Onnur fyrimyndin er hjálpt sjálvmorð, har sjúklingurin tekur sítt egna lív við hjálp frá til dømis læknanum ella øðrum, sum ávísa ella útvega deyðiligar medisinir.
/Ritzau/
