Jan Müller
Millum teirra, sum eftir lokna útbúgving í Hoydølum, og eitt ára lestur á Fróðskaparsetrinum hevði hug til at vita meira um hesa fyri okkum so nýggju vinnu, er Regin Hammer úr Havn.
Eftir studentaskúlan fór hann á Fróðskaparsetrið, har hann var í eitt ár. Tað gav honum beinleiðis atgongd til 2. ár á Robert Gordon universitetinum í Aberdeen, har hann bert 20 ára gamal byrjaði at lesa búskap. Útbúgvingin tók trý ár. Tað er rættiliga kostnaðarmikið hjá føroyingum at lesa í Skotlandi, og fekk Regin stuðul frá Shell í Føroyum til lesturin.
Áhugin hjá Regin fyri eini komandi føroyskari oljuvinnu sæð út frá einum búskaparligum ljósi og tann sannroynd, at Aberdeen er oljuhøvuðsstaðurin í Bretlandi, gjørdu tað rættiliga náttúrligt at fara víðari við lesnaðinum. Og tá tey trý stóru oljufeløgini í AMG-bólkinum, Statoil, Mobil og Enterprise settu lýsingar í føroysku bløðini, har tey buðu føroyingum legat, um áhugi var fyri at taka hægri lestur í Bretlandi við atliti til eina oljuvinmnu, søkti Regin. Úrslitið varð, at hann fór at lesa olju- og gassbúskap á lærda háskúlanum í Dundee.
Hetta var eitt sera áhugavert tíðarskeið, har Regin fekk serútbúgving í orkubúskapi og harundir í skatting av oljufeløgum. Í september í fjør fekk hann starv í Fíggjarmálastýrinum, sum eisini hevur endaligu ábyrgdina av skatting av eitt nú oljuvinnuni í Føroyum.
Kolvetnisskattalógin, sum nú er løgd fyri tingið, var meira enn hálv liðug, tá Regin byrjaði at arbeiða í Fíggjarmálastýrinum.
Regin veit ikki, hvussu framtíðin verður, men honum dámar væl á sínum nýggja arbeiðsplássi, eisini tí at tað hann hevur útbúgvið seg til, olju- og gassskatting, er nakað sum verður lagt til rættis á Fíggjarmálastýrinum.
