Í løtuni eru seks partrolarapør til fiskiskap, men fiskiskapurin hjá trolarunum, sum royna eftir upsa, er framvegis einki at reypa av. Skipini koma inn at landa, sum næsta vika gongur.
Á Fiskamarknaði Føroya vita tey at siga, at tveir djúpvatnstrolarar eru vestan fyri og fiska kongafisk. Væntandi koma bæði skipini inn at landa síðst í vikuni sum kemur.
Teir smáu trolbátarnir liggja allir við bryggju í løtuni. Veðrið hevur verið óstøðugt og skiftandi, men trolbátarnir loysa væntandi aftur, tá líkindini verða betri.
Tvey skip fiska við gørnum. Annað fiskar svartkalva og kemur inn at landa síðst í næstu viku. Teir hava brúkiligan fiskiskap.
- Skipið, sum fiskar havtasku, hevur eisini brúkiligan fiskiskap, og kemur væntandi inn at landa miðskeiðis í næstu viku, verður lagt aftrat.
