28 ára gamli framrættaði miðvallarin hjá HB, Símun Samuelsen var loksins at síggja á vøllinum aftur, aftaná ein drúgvan skaðasteðg uppá næstan níggju mánaðir.
Símun Samuelsen fekk teir seinastu 27 minuttirnar á vøllinum í 4-1 heimasigrinum ímóti NSÍ á ovara vølli í Gundadali í dag. Hetta markeraði Símun Samuelsen við at skora til støðuna 3-1. Pál Mohr Joensen spældi hann snilt leysan inn um, og Símun var púra kaldur, tá ið hann lyfti bóltin upp um Andras Gango og í málið.
Símun stórfegnast um at verða á vøllinum aftur, og hann hevur góðar vónir um at kunna fullføra kappingarárið. Tað lá ikki í kortunum, at hann skuldi skora í sínum fyrsta dysti, aftaná skaðasteðgin, men tað gjørdi tað ikki verri.
Við at TRÝSTA á PÍLIN undir MYNDINI ber til at hoyra samrøðuna Tróndur Arge hevði við Sìmun Samuelsen, aftaná dystin millum HB og NSÍ. Fremst í ljóðbrotinum hoyra vit frásøgnina hjá Tróndi á Rás2, tá hann segði frá málinum hjá Símuni Samuelsen.
