Grýlu­dansurin 16 ár

Fyri 16. ferð skipar dansi­felagið Kom og Dansa fyri grýludansi føstu­lávints­leygarkvøld 17. februar.
Í ár verður tiltakið í Ment­anarhúsinum í Fugla­firði, og til dansin í ár fara teir vælumtóktu Showmenn at spæla.
Fyrireikararnir siga, at teir hava hesi árini roynt at gera tiltakið meira fjøl­broytt enn tey flestu dansi­tiltøkini, og hevur nógv forvitnisligt verið á skránni hesi árini.
Sigast kann, at hetta er vorðin ein verulig tradi­tión, og hava nógv fólk verið til dansin hvørt ár. Mest úr Eysturoynni, men nógv eru eisini kom­in aðrastaðni frá.
Og nú Norðoyatunnilin er komin, ber væl til hjá norðoyingum at koma til tiltakið.
Mong av teimum sum koma hava nýtt møgu­leik­an at lata seg í grýlu­klæðir. Ein hevur týðiliga sæð, at nógv av teimum hava brúkt nógva tíð at seyma og annars gera sær eina drakt.
Fyri at gera tað meira áhugavert og spennandi at gera góð og orginal grýluklæði, hevur tað á hvørjum ári verið latnir góðir vinningar til bestu grýlurnar, og í ár verða eis­ini góðir vinningar lat­nir til nr 1-2-3.
Nevnast kann, at grýlu­klæðini skulu vera heima­gjørd fyri at koma uppí part, tá dømast skal.
Ikki tí, keypt grýlu­klæð­ir eru eisini meira enn vælkomin, men tað verð­ur ikki hildið at ver­ið rætt, at ein sum fer inn í ein handil og keypir sær ein drakt, skal vinna yvir einum, sum hevur sit­ið og hevur nýtt hendur og hugflog og nógva tíð til arbeiðið.
Bussar koyra úr Vág­um, Vestmanna, Tórs­havn og Sundalagnum, eins og bussar koyra av Strondum og Toftum, á veg­num verður koyrt gjøg­num Gøtu og Leir­vík.
Eisini er møguligt at koma úr Klaksvík við bussi.
Allir bussarnir koyra heim aftur eftir dansin.
Alt hetta stóra tiltakið verður í Mentanar­húsi­num í Fuglafirði leygar­kvøldið 17. februar.