Illveður var tann dagin, tá ellivu ára gamli Kjartan Festirstein var so óheppin at detta á sjógv á veg heim til húsa á Argjum. Nógvi vindurin gjørdi, at Kjartan skjótt rak út frá landi, og mundi hann vera einar 70 metrar út frá Argjalandinum, tá bjargingarmenn hansara lupu á bláman.
Hannus og Høgni ivaðust onga løtu í at leypa á bláman í illveðrinum tann 9. september, hóast teir vistu, at teir sjálvir settu lívið í vága. Teir skuldu bjarga hesum unga lívinum, og tað gjørdu teir eisini.
Sum heiður fyri stóra bragdið, fingu teir fyrradagin handaða gullnál frá Leif Eriki Niclasen, gullsmiði í Havn.
? Eg kann ikki lata vera við at hugsa um nakað, ið ikki hevur beinleiðis samband við hetta. Tit eru ungir og hava livað, sum øll onnur ung, í vanda fyri at doyggja í ferðsluni. Men deyðir eru tit ikki, og kanska var ein meining við júst hesum, segði hann, tá hann setti nálirnar á bringur teirra.
