Tað er ikki so ofta, at av av okkara kendastu rockbólkum, Chase, letur hoyra frá sær. Men í summar gera teir eitt undantak, tá ið teir hava konsert á summarfestivalinum í Klaksvík beint eftir ólavsøku. Og hetta verður einki minni enn ein 25 ára hátíðarkonsert, tí í ár eru tað 25 ár síðani, teir fyrstu ferð stigu á pall.
- Teir vóru føroyska svarið upp á Def Leppard, Bon Jovi og Motley Crue. Teir spældu svingandi og rock, sum fall væl í oyrað og so dugdu teir framúr væl at spæla og framføra á palli, siga fyrireikararnir
Fleiri av teirra sangum blivu landaplágur, eitt nú Fyrstu Ferð, Two Hearts, Tú og Eg og Sjey Míl Frá Hollywood. Chase góvu eina fløgu út fyrst í nítiárunum, og eini fimtan ár seinni góvu teir sína seinnu fløgu út.
- Í báðum førum var talan um frálíkan rocktónleik, sum varð nógv at hoyra, siga tey, sum fyrireika summarfestivalin.
- Tað eru nú liðin 25 ár, síðani rockbólkurin Chase spældi sínar fyrstu tónar, og í ár ætla teir at halda sítt silvurbrúdleyp við gomlum landaplágum og nýggjum sangum á Summar Festivalinum. Hesir sangir verða givnir út talgildir í summar í sambandi við 25 ára hátíðarhaldið hjá bólkinum. |
- Tá ið Chase rundaði 20 ár, spældu teir á Summar Festivalinum, og í august fara teir aftur á pallin at framføra sínar gomlu landaplágur, umframt og nýggjar sangir.
