Emmy virðislønirnar vóru handaðar í nátt í Los Angeles og fólkini handan sjónvarpsrásina HBO hava alla orsøk at fegnast.
Rásin hevur framleitt vinnararnar av trimum teimum mest virdu heiðurslønunum, Game of Thrones, sum vann heiðurin sum besta drama, Veep, sum varð kosið besta stuttrøð, og Olive Kitteridge, sum gjørdist besta smárøð.
Hetta var eitt ordiligt come-back hjá Game of Thrones, sum, hóast góðar vónir, onga virðisløn vann í fjør. Fantasirøðin vann í ár fýra heiðurslønir. Peter Dinklage, sum spælir stuttvaksti Tyrion Lannister, fekk heiðurslønina fyri besta mannliga stuðulsleikara í eini dramarøð. Røðin var tilnevnd ikki færri enn 24 heiðurslønir.
Veep vann somuleiðis fýra heiðurslønir. Umframt at vera kosin besta skemtirøð, fekk Julia Louis-Dreyfus, sum kanska er best kend frá røðini Seinfeld, heiðurin sum besti kvinnuligi høvuðsleikari í eini skemtirøð.
Olive Kitteridge fekk ikki færri enn seks heiðurslønir, besta stuttrøð, besti mannligi og besti kvinnuligi høvuðsleikari í eini stuttrøð og besti mannligi stuðulsleikari í eini stuttrøð, umframt heiðurslønir fyri leikstjórn og ritstjórn.
Jon Hamm, ið spælir høvuðsleiklutin sum Don Draper í Mad Men, vann eisini fyri fyrstu ferð, umframt at Viola Davis gjørdist fyrsta myrka kvinnan, sum fekk heiðurin sum besti kvinnuligi høvuðsleikari í eini dramarøð, fyri hennara leiklut í How To Get Away With Murder.
Annars vann The Daily Show eisini tríggjar virðislønir.
Her eru nakrir av vinnarunum
Game of Thrones – besta dramarøð
Veep – besta skemtirøð
Olive Kitteridge – besta stuttrøð
The Voice – besta realitykapping
Bessie – besti sjónvarpsfilmur
Shark Tank – besta tilrættalagda realityrøð
Deadliest Catch – besta ótilrættalagda realityrøð
Viola Davis (How to Get Away With Murder) – besti kvinnuligi høvuðsleikari í dramarøð
Jon Hamm (Mad Men) - besti mannligi høvuðsleikari í dramarøð
Peter Dinklage (Game of Thrones) – besti mannligi stuðulsleikari í dramarøð
Uzo Aduba (Orange is the New Black) – besti kvinnuligi stuðulsleikari í dramarøð
Richard Jenkins (Olive Kitteridge) – besti mannligi høvuðsleikari í stuttrøð
Frances McDormand (Olive Kitteridge) – besti kvinnuligi høvuðsleikari í stuttrøð
Bill Murray (Olive Kitteridge) – besti mannligi stuðulsleikari í stuttrøð
Regina King (American Crime) – besti kvinnuligi stuðulsleikari í stuttrøð
Julia Louis-Dreyfus (Veep) – besti kvinnuligi høvuðsleikari í skemtirøð
Jeffrey Tambor (Transparent) – besti mannligi høvuðsleikari í skemtirøð
Tony Hale (Veep) – besti mannligi stuðulsleikari í skemtirøð
Allison Janney (Mom) – besti kvinnuligi stuðulsleikari í skemtirøð
