Helge Ask hjá Roskilde Vikingeskipsmuseum vitjar í Føroyum í hesum døgum. Skipið verður partur av Víkingadøgum í Hovi um vikuskiftið.
Klokkan var farin av 17, tá víkingaskipið, ið ikki er av teimum størstu, legði frá bryggju í Vági, og kósin varð sett móti Hovi.
Manningin, eini 17 - 18 í tali, settist við árarnar, og einu løtuni royndu tey eisini seglið, men nærum ongin vindur er, so manningin settist aftur við árarnar.
Umborð eru danir frá savninum í Roskilde, men eisini vágbingar, ið hjálpa til við at rógva skipið til Hovs.
Onkur av gomlu grindabátunum í Vági sást fylgja Helga Ask út eftir Vagsfirði.
Pláss er fyri 26 fólkum við árarnar umborð á Helge Ask. Skipið kom til Føroya við Norrønu og til Suðuroyar við Smryrli.
