Hetta er tíðin jólatrø og annað grann verður innflutt til landið í hópatali. Ofta draga vit skaðakykt inn í stovurnar við okkum, og fleiri okkara kunnu vænta sær, at meir enn bert gávurnar liggja undir trænum.
Les: Ofta eru smákykt í jólatrøunum
Høgni Holm, lívfrøðingur, greiðir frá, at skal eitt smákykt roknast sum skaðakykt í Føroyum, so skal tað kunna gera skaða á eitthvørt. Hetta er til dømis viðarlundir, bygningar, djór ella fólk. Eisini skal kyktið kunna yvirliva minst eina heila árstíð - og gjarna fleiri - í Føroyum. Hetta merkir, at kyktið skal kunna finna føði og fáa avkom.
Hann greiðir frá, at hesi skaðakyktini kunnu verða innflutt við jólatrøunum, sum koma til landið:
Bólamotta (gallemide á donsum) Nalepella shevtchenkoi og Nalepella danica
Trantaklukka (Blåsnude, snudebiller) Strophosomus sp.
Aðalgrannlús (Ædelgranlus) Dreyfusia nordmanniana
Stór nálatrætrantaklukka (Stor nåletræsnudebille) Hylobius abietis
Firvaldur, hvørs ormvera livur av grantrøum (Ædelgrannålevikler) Epinotia subsrquana og E. fraternana Hw.
Eisini innflyta vit sokallaði gagndýr til Føroyar við jólatrøum. Gagndýrini eru øll rovdjór, sum liva av ormverum og/ella eggum hjá skaðadjórum nevnd omanfyri, greiðir Høgni Holm frá, og hesi kunnu millum annað verða:
Gulleyga (Guldøje) Chrysopa carnea
Tvísterta (Ørentvist) Forficula auricularia
Mariuhøna (Mariehøne) Coccinellidae sp.
Nevteka (Næbtæge) Antochoris nemoralis
