Tað var seinnapartin hósdagin, at teir báðir sendu út tíðindaskriv, har teir boðaðu frá, at teir fóru at leggja uppskot fram um nýval. Hetta varð endurgivið í fleiri miðlum seinnapartin hósdagin og í tíðindunum í útvarpinum klokkan 18 hetta kvøldið.
Klokkan 23:26 hetta kvøldið opnar Annita á Fríðriksmørk eitt nýtt dokument í telduni og setist at skriva lesarabrævið, har hon beinleiðis sigur – eins og Jørgen og Kári, at vit skulu hava val í september:
»Nú er tíðin komin til nýval, so vit kunnu byrja frá byrjan av einum valskeiði, og ikki sum nú, har landsstýrisfólk mest sum eru desperat at fáa mál avgreidd áðrenn valið.
Tað líkist alt ov nógv eini roynd at fáa ein varða eftir seg heldur enn at geva málinum ta viðgerð, tað hevur uppiborið.
Og tá er drívmegin persónligur vinningur, sum løgmaður í løgmansrøðuni heldur eigur at verða orsøk til nýval.
Dúgliga verður telvað við einum vali. Men so mikið eigur man at kunna rokna út, at áðrenn næsti mánaður er farin afturum, hevur løgtingsval verið!«
Ergo: Forkvinnan í tingbólkinum hjá Tjóðveldinum er samd við Jørgen og Kára um, at val skal vera í september! Men nú dregur frúan í land. Hon hevur ongantíð sagt, at hon tekur undir við teimum báðum – og at hjartamálini skulu avgreiðast áðrenn.
– Vit meina tað, Annita. Tað er menniskjansligt at stíga við síðuna av. Men ikki serliga smart at boða frá vali samstundis sum Tjóðveldi hevur søguligan møguleika at fáa síni hjartamál samtykt. Og at skjóta eftir miðlunum er eitt sindur soleiðis... Tá var tað meira virðiligt at taka í egnan barm.
Men at valið verður framskundað, tað vistu vit øll.
