Tað sigur Djóni Nolsøe Joensen, landsstýrismaður í barna- og útbúgvingarmálum, í svari til grein 52a fyrispurning frá Anniku Olsen, løgtigskvinnu.
Hon spurdi soleiðis landsstýrismannin um samsýning til fosturforeldur:
- Er Fosturforeldrafelagið við í arbeiðinum í sambandi við eftirmeting av fosturforeldraskipanini?
- Um nei, hvør er orsøkin til tað?
- Er spurningurin um samsýning til fosturforeldur ein partur av hesum arbeiðinum?
- Er ætlanin at hækka samsýningina til fosturforeldur?
Í svarinum til teir báðar fyrstu spurningarnar sigur landsstýrismaðurin at Barna- og útbúgvingarmálaráðið hevði tann 9. desember 2025 innleiðandi fund um arbeiðið at eftirmeta fosturforeldraskipanina, har allir viðkomandi partar, eitt nú Fosturforeldrafelagið, luttóku.
– Eftir ætlan fer sjálvt arbeiðið í gongd í januar 2026, og verður Fosturforeldrafelagið og aðrir viðkomandi partar tikin við undir tilgongdini av arbeiðinum, sigur Djóni Nolsøe Joensen.
Í svarinum til triðja spurningin sigur hann:
– Ja, spurningurin um samsýning fer at verða fevndur av arbeiðinum.
Og til síðsta spurningin vísir hann á, at í hvønn mun ætlanin er at hækka samsýningina, er tongt at tí niðurstøðu, sum kemur í sambandi við greining av 3. spurninginum, men ikki er ósannlíkt, at samsýningin verður broytt.
– Vísandi til at kommunurnar eru inn yvir, hvat fígging viðvíkur, er tað tó umráðandi at hava tær við í hesum, soleiðis at ein skynsamur fíggingarleistur við samsýningum verður gjørdur, sigur Djóni Nolsøe Joensen, landsstýrismaður.
