Iranska verjan hevur roynt eina nýggja rakett, sum ber 300 kilometrar, og sambært verjumálaráðharranum, Ahmad Vahidi, eydnaðist royndin væl.
Ráðharrin sigur, at rakettin, sum hevur fingið heitið Fateh-110, er útgjørd við sera framkomnari leitiútgerð, og at hon kann brúkast til mál í Persaflógva og Omanvíkini. Tað merkir, at rakettin kann røkka eitt nú teirri amerikonsku herflotastøðini í Bahrein.
Iran hevur fyrr kunngjørt, at landið hevur roynt rakettir, sum bera meiri enn 1.000 kilometrar, men tað hava fleiri lond, teirra millum Russland, avsannað.
