Írland hevur framt tað ógjørliga í HM-undanbólki F.
Farna hóskvøld vunnu teir á heimavølli 2-0 á greiða oddaliðnum, Portugal, og í kvøld framdu teir enn eitt bragd. Írland var á útivølli á Puskas leikvøllinum í Budapest. Teir vóru aftanfyri 1-2 móti Ungarn, men kravið var sigur. Við tveimum málum seinastu 10 minuttirnar vendi Írland 1-2 til ein 3-2 sigur, og nú er tað Írland og ikki Ungarn, ið skal spæla Play Off dystir um at sleppa til HM-endaspælið í USA, Meksiko og Kanada.
Troy Parrott er tjóðarhetja í Írlandi. Hann skoraði hattrick í dag, og hóskvøldið skoraði hann bæði málini í dystinum móti Portugal. Íslendski landsliðsvenjarin hjá Írlandi, Heimir Hallgrímsson hevur eisini fingið góða endurreisn aftaná at hava verið meira ella minni niðurgjørdur í írsku miðlunum. Men tannlæknin úr Vestmannaoyggjunum er komin sterkt aftur.
Portugal vann bólk F og harvið beinleiðis HM-atgongumerkið í stórum stíli. Teir vunnu í dag stórsigur 9-1 á Armenia á Dragao leikvøllinum í Porto. Og hendan risasigurin megnaðu teir uttan Cristiano Ronaldo, ið hevði leikbann. Longu í steðginum var støðan 5-1.
Portugal vann bólkin við 13 stigum, og Írland endaði á øðrum plássinum við 10 stigum. Ungarn endaði á átta stigum, og Armenia endaði aftast við trimum stigum.
Ungarn-Írland 2-3 (2-1)
1-0 Daniel Lukacs ('3 )
1-1 Troy Parrott, br. ('15 )
2-1 Barnabas Varga ('37 )
2-2 Troy Parrott ('80 )
2-3 Troy Parrott ('90 )
Portugal-Armenia 9-1 (5-1)
1-0 Renato Veiga ('7 )
1-1 Eduard Spertsyan ('18 )
2-1 Goncalo Ramos ('28 )
3-1 Joao Neves ('30 )
4-1 Joao Neves ('41 )
5-1 Bruno Fernandes, br. ('45 )
6-1 Bruno Fernandes ('52 )
7-1 Bruno Fernandes, br. ('72 )
8-1 Joao Neves ('81 )
9-1 Francisco Conceicao ('90 )
